மிளகு ரசம் (Milagu Rasam) செய்வது எப்படி என்று பார்க்கலாம். கடந்த செவ்வாய்க்கிழமை அன்னபூரணி தொடரின் முதல் பகுதியில் நாட்டுக்கோழி சூப்பைப் பார்த்தோம். அது பலருக்கு பிடித்திருந்தது என்று உங்கள் கருத்துக்களில் இருந்து தெரிகிறது. குளிர் காலத்தில் உடலுக்கு வெப்பம் தரும் அந்த சூப் இப்போது பல வீடுகளில் சமைக்கப்பட்டிருக்கும் என்று நம்புகிறேன். இந்தத் தொடர் தொடர்கிறது ஒவ்வொரு செவ்வாயும் இலங்கையின் சமையலறைகளில் இருந்து ஒரு ஆரோக்கியமான, எளிதான உணவு வகையை உங்களிடம் கொண்டு வருவோம். அடுத்த வாரம் பகுதி 3-ஐ எதிர்பாருங்கள்!
இப்போது இலங்கையில் வானிலை திடீரென மாறி வருகிறது. ஒரு பக்கம் மலைநாடுகளில் குளிர் தொடர்கிறது, மறுபக்கம் கொழும்பு போன்ற நகரங்களில் காற்று மாசு அதிகரித்திருக்கிறது. வாகனப் புகை, கட்டட வேலை, தூசி… இவை எல்லாம் சேர்ந்து பலருக்கு சளி, இருமல், தொண்டை எரிச்சல், மூக்கடைப்பு என்று உடல்நலக் குறைவுகளை ஏற்படுத்தியிருக்கின்றன. குறிப்பாக குழந்தைகளும் பெரியவர்களும் இதனால் அவதிப்படுகின்றனர். இந்தச் சூழலில் உடலுக்கு இலகுவாக ஜீரணமாகும், சுவாசப் பிரச்சினைகளைத் தணிக்கும் உணவு ஒன்று தேவை. அதற்கு ஏற்றது மிளகு ரசம் (Milagu Rasam). இலங்கைத் தமிழ் வீடுகளில் பழமையான இந்த ரசம் (Milagu Rasam); மிளகு, சீரகம், பூண்டு நிறைந்தது, இருமலைத் தணிக்கும், சளியைப் போக்கும், உடலுக்கு வெப்பம் தரும். துவர்ப்பு, காரம், புளிப்பு சேர்ந்த இந்த ரசம் ஒரு கிண்ணம் குடித்தால் தொண்டை சுகமாகி, மனமும் Relax ஆகும்.
மிளகில் உள்ள பைபரின் என்ற பொருள் இருமலை குறைக்கும். சீரகமும் பூண்டும் நோய் எதிர்ப்பு சக்தியை அதிகரிக்கும். இது சைவ உணவு – கோழி சூப்புக்குப் பிறகு இது ஒரு இலகுவான மாற்றம்.
மிளகு ரசம் (Milagu Rasam) செய்வதற்கு தேவையான பொருட்கள் (4 நபர்களுக்கு)
- புளி – ஒரு நெல்லிக்காய் அளவு (தண்ணீரில் ஊறவைத்து சாறு பிழிந்தது)
- மிளகு – 1 டேபிள் ஸ்பூன் (பொடியாக அரைத்தது)
- சீரகம் – 1 டீ ஸ்பூன்
- பூண்டு – 6-8 பற்கள் (பொடியாக நறுக்கியது அல்லது அரைத்தது)
- தக்காளி – 2 (பொடியாக நறுக்கியது)
- மஞ்சள் தூள் – ¼ டீ ஸ்பூன்
- கறிவேப்பிலை – 3-4 கொத்து (இலங்கை சுவைக்கு அதிகம் சேர்க்கலாம்)
- கொத்தமல்லி – அலங்காரத்துக்கு
- உப்பு – தேவையான அளவு
- நெய் அல்லது தேங்காய் எண்ணெய் – 1 டேபிள் ஸ்பூன்
- கடுகு – ½ டீ ஸ்பூன்
- தண்ணீர் – 4-5 கப்
- பெருங்காயத்தூள் – சிறிது (விரும்பினால்)
செய்முறை
- முதலில் மிளகு மற்றும் சீரகத்தை சிறிது வறுத்து பொடியாக அரைத்துக்கொள்ளுங்கள். இது ரசத்தின் முக்கிய சுவை.
- ஒரு பாத்திரத்தில் புளி சாறு எடுத்து, அதில் 4 கப் தண்ணீர் சேர்த்து கொதிக்க விடவும். மஞ்சள் தூள், உப்பு, பெருங்காயத்தூள் போட்டு மிதமான தீயில் வைக்கவும்.
- தக்காளியைச் சேர்த்து மென்மையாகும் வரை கொதிக்க விடவும்.
- இப்போது அரைத்த மிளகு-சீரகப் பொடியைச் சேர்த்து கிளறவும். 5 நிமிடங்கள் கொதிக்கட்டும் – காரமான மணம் வரும்.
- தனி கடாயில் நெய் அல்லது எண்ணெய் ஊற்றி கடுகு போடவும். வெடித்ததும் பூண்டு, கறிவேப்பிலை சேர்த்து வதக்கி, இந்த தாளிப்பை ரசத்தில் ஊற்றவும்.
- இறக்கும் போது கொத்தமல்லி தூவி, சூடாகப் பரிமாறவும்.
Images – Kannammacooks.com
சில கூடுதல் குறிப்புகள்
- இருமல் அதிகமாக இருந்தால் மிளகை இன்னும் சற்று அதிகமாகச் சேர்க்கலாம்.. சளி விரைவில் குறையும்.
- விரும்பினால் சிறிது இஞ்சி அரைத்துச் சேர்க்கலாம் – கூடுதல் வெப்பம் கிடைக்கும்.
- குழந்தைகளுக்கு மிளகை சற்றுக் குறைத்து, தக்காளியை அதிகமாகப் போடுங்கள்.
- இந்த ரசத்தை தனியாக சூப்பாகவும், சாதத்துடன் கலந்தும் சாப்பிடலாம்.. இரவு உணவுக்கு ஏற்றது.
இந்த மிளகு ரசம் (Milagu Rasam) ஒரு கிண்ணம் குடித்தால் தொண்டை சுத்தமாகி, இருமல் குறைவதை உணர்வீர்கள். இலங்கையின் இந்த மாறும் வானிலையிலும் காற்று மாசு நிறைந்த நாட்களிலும் இதை வாரம் இரண்டு முறையாவது செய்து பாருங்கள், உடல் நன்றாகப் பாதுகாக்கப்படும்.
அன்னபூரணி தொடரின் இரண்டாவது பகுதி இது. அடுத்த செவ்வாய்க்கிழமை மற்றொரு இலங்கைச் சுவையான, உடலுக்கு நன்மை தரும் உணவுடன் சந்திப்போம். அதுவரை இந்த ரசத்தை செய்து பார்த்து உங்கள் கருத்தைப் பகிருங்கள்!
ஆரோக்கியமாக இருங்கள், சுவையாகச் சாப்பிடுங்கள்!
Read Related Content in the Blog – உணவுக்குறிப்புகள்
